Negosyo apektado tungod sa linog
CEBU, Philippines - Daghang mga dagkong establisamento ang nanirado kagahapon ug ang uban wala na gyud mangabli sa naandan nilang oras pagpangabli dihang miigo ang linog sa Central Visayas.
Naglumba ang mga empleyado sa nagkadaiyang mga establisamento sa pagpanggawas sa ilang mga trabahoan ug ang uban mipauli na lang gyud tungod sa kahadlok.
Gani sa dalan Colon kagahapon, napuno gyud sa mga tawo ang dalan ug dili kaagian sa mga sakyanan tungod sa mga tawo ug mga debris nga nagsige og pangatagak gikan sa mga karaang buildings.
Bisan wala pay opisyal nga pamahayag gikan sa nagkadaiyang chamber of commerce sa Metro Cebu apan napanglantawang dako kaayo ang alkanse nga nasinati sa mga negosyante kagahapon.
Bisan sa Carbon Public Market gamay ra kaayo ang mga tawong nangompra human sa pagtay-og.
Apan duna say mga nabantayan ang Banat News nga daw nag-panic buying ilabi na sa produktong gasolina tungod kay dunay mga pribadong sakyanan nga namalit og gasolina nga gipanulod lang sa container sa tubig sa mineral water.
Nakapasalamat usab ang mga taga Central Visayas nga pista opisyal tungod sa Eid-ul Adha sa Islam ug walay klase.
Usa ka bag-ong building sa Hipodromo Elementary School ang naliki ang third floor niini. Ang maong building maoy klasehan sa science class sa grade four sa maong elementarya. (BANAT NEWS)
- Latest
