Linog sa bohol major earthquake kini sud sa nakalabay’ng 400 ka tuig

CEBU, Philippines - Ang director sa Philippine Institute of Volcanology (Phivolcs) Renato Solidum miingon nga major earthquake ang linog nga miigo sa Carmen, Bohol kagahapong adlawa.

Sa report sa Bombo Radyo. Com nga si Solidum miingon kini  major earthquake ang kategoriya sa linog nga miigo sa kabisay-an kagahapon.

Base usab sa report sa 24-Oras kagabii, mikabat na sa 289 ka aftershocks ang narehistro sa Phivolcs sugod sa paglurang sa 7.2 magnitude nga linog duol sa epicenter niini ug ang kinakusgan nga natala sa Phivolcs mao ang intensity 5.

Matud ni Solidum nga tectonic ang hinungdan sa maong linog o ang paglihok sa East Bohol Fault nga may giladmon nga 33 kilometros.

Nabatyagan ang Intensity 7 sa Tagbilaran City; Intensity 6 sa Inigaran, Negros Occidental; Intensity 5 sa Iloilo City; La Carlota; Intensity 4 sa Masbate City; Roxas City; San Jose, Culasi, Antique; Guihulngan, Negros Oriental ug  Intensity 3 sa Davao City.

Matud ni Solidum nga mamahimong moabot pa og usa ka buwan nga makasinati ang rehiyon og mga aftershocks  ilabi na duol sa epicenter sa maong linog.

Duna nay duha ka teams sa Phivolcs ang mibiyahe padung sa Carmen, Bohol aron masusi ang epicenter sa linog ug aron matun-an ang sitwasyon sa East Bohol fault line.  Matud ni Solidum nga ang usa ka team mobiya sa Manila karong adlawa ug mobiya ang usa sa Huwebes.

Tumong sa maong pagtuon nga mahibaw-an kung duna bay posibilidad nga duna pay linog nga mahitabo susama sa kagahapon.

Matud pa nga walay record ang Phivolcs sa linog sa maong fault line ug matud pa nga kapin sa 400 na ka tuig nga mitala kini og major earthquake sa East Bohol Faultline. (BANAT NEWS)