DEPED mideklarar nga way klase karong adlawa

CEBU, Philippines - Walay klase sa tanang publiko nga tunghaan sa dakbayan sa Sugbo ug ubang bahin sa Central Visayas karong adlawa.

Kini maoy gipahibalo ni Department of Education (DepEd)-7 Regional Director Carmelita Dolangon tungod kay ang mga ospiyal sa lainlaing tunghaan mosusi pa kun dili ba peligro nga gamiton ang mga school-building.

Si DepEd Cebu City Superintendent Rhea Mar Angtud nagkanayon nga suwerte nga wala’y klase kagahapon kay nalikayan ang dakung problema, ilabi na sa mga tinun-an nga kabataan nga posible nga matarantar sa linog.

Daghang mga tagdumala og pribadong tunghaan sama sa CIT University ug University of Cebu nga mipahibalo nga wala sila’y klase ugma. Si Atty. Agusto W. Go, presidente sa University of Cebu, mipahibalo nga dili sila magklase kay ipasusi niya kun unsay kadaut sa ilang school buildings tungod sa linog.

Matud ni Go nga gusto niya nga masiguro ang kaluwasan sa tanang tinun-an mao nga gimando niya ang pagsuspenso sa klase karong adlawa. Sa laing bahin, si Vice Mayor Edgardo Labella misugyot ngadto sa mayor nga hulmahon ang mga team sa technical personnel aron mosuta sa lainlaing mga building sa dakbayan kun unsay kadaut nga namugna sa linog.

Ang kadagkoan sa Metro Cebu Water District (MCWD) miingon nga wala sila'y problema sa supply sa tubig ug ingon usab ang gibutyag sa Visayan Electric Company (VECO) nga wala sila maproblema sa ilang supply sa kuryente.

Ang kahugpongan sa mga contractors sa dakbayan -- ang Cebu Contractors Association -- misaad nga mopagamit sila sa ilang equipment kun gikinahanglan.  (BANAT NEWS)