Binilyon ang danyos nga gibilin sa linog

CEBU, Philippines - Binilyon ka pesos nga mga imprastraktura sa gobiyerno ug pribado ang gibiling danyos sa 7.2 magnitude nga linog kagahapon sa Kabisay-an nga ang sentro nahimutang sa Carmen, Bohol nga nabatyagan hangtod sa dakbayan sa Davao didto sa Mindanao.

Sumala pa sa talaan sa Office of Civil Defense- Region 7 nga giisyu niini sa alas-2 sa hapon kagahapon nga 28 na ka tawo ang nakalas sa Central Visayas ug 189 na ka tawo ang naangol.

Matud pa sa OCD nga 16 ang patay sa Bohol ug 102 ang angol, 9 sa Sugbo ug 87 ang angol,  ug usa sa Siquijor.

Apan sa pag-abot sa alas-5 sa hapon, nadugangan kini og nahimong 67 ka tawo ang nakalas. Sa report sa Bomboradyo.com, duna nay 93 ka mga tawong nakalas ug kapin 200 na ang nangaangol.

 Hinuon nagkalain-lain ang gidaghanon sa mga nakalas sa maong katalagman depende sa kung asa kini nakuha.

Wala pa hinuoy eksaktong danyos ang natala sa OCD apan tungod sa mga estrakturang nangaguba ilabi na sa Bohol dako ang danyos nga gibilin niini.

Grabe ang kadaot sa mga imprastraktura sa Bohol nga tua mismo ang epicenter sa maong linog sa lungsod sa Carmen sa Bohol pipila sa mga naguba ug nahugno mao ang mga makasaysayanon ug karaang simbahan sa Clarin, Dauis, ug sa simbahan sa Loboc.

Samtang dili na sab maagian ang duha ka taytayan sa lungsod sa Loboc ug ang mga karsada sa upat ka lungsod sa Bohol dili na maagian.

Gani hasta ang tourist spot sama sa Chocolate Hills natumpag ang pipila ka bahin sa maong linog.

Samtang sa Cebu City pipila ka mga buildings ang nangliki ug nahugno lakip sa nahugno mao ang kampanaryo sa Basilica Minore del Sto. Niño nga nakaigo og usa ka motorsiklo apan luwas hinuon ang nagsakay niini.

Nahugno sab ang concrete gutter sa Pasil Fish Port ug nakadat-og og lima ka tawo.

Pipila ka hospital ang mipagawas sa ilang  mga pasyente atol sa maong linog lakip na sa Cebu Doctors University Hospital nga dunay aso nga nakita sa ika-limang andana niini.

Ang Vicente Sotto Memorial Medical Center mipagawas sab sa mga pasyente  tungod kay may liki ang ika-upat nga andana niini.

`Dunay mga pribadong buildings usab ang nangaguba ug mga sakyanang nangadat-ogan og mga semento gikan sa mga buildings.

Midahili ang yuta sa barangay Kawasan sa lungsod sa Aloguinsan ug gipabakwit na ang mga molupyo sa maong lugar.

Samtang dili na maagian ang highway sa lungsod sa Boljoon tungod sa landslide apektado sab sa landslide ang lima ka barangay sa lungsod sa Argao.

Samtang ang departure terminal sa Mactan Cebu International Airport dili na usab maagian tungod kay naguba ang walkthrough scanner sa, computer ug kisame niini.

Samtang gikanselar ang biyahi sa tanang mga barko sa pantalan sa Sugbo ug sa Siquijor. (BANAT NEWS)