P15B nga AIP sa sunod tuig giaprubahan sa CCDC
CEBU, Philippines - Giaprobahan na sa Cebu City Development Council (CCDC) ang P15.1 Bilyones nga Annual Investment Plan (AIP) para sa lainlaing proyekto sa dakbayan sa Sugbo karong sunod tuig.
Apan si Mayor Michael Rama wala gihapon maniguro nga mas daku pa sa P15 Bilyones ang kantidad sa isugyot niya nga Annual Budget 2014.
Ang pag-aprobar sa AIP maoy kabahin sa pagpreparar sa tinuig nga budget kay dili maaprobahan sa konseho ang Annual Budget kun wala pay Annual Investment Plan nga aprobado sa CCDC.
Sa AIP nga giaprobahan sa City Development Council kagahapon, ang walo ka bilyon ka pesos niini gitumong alang sa lainlaing infrastructure projects.
Ang Office of the Mayor gipagahinan og kapin sa P4 Bilyones nga kantidad alang sa pagpatuman og mga infrastructure projects samtang kapin usab sa P4 Bilyones ang gigahin sa Department of Engineering and Public Works (DEPW).
Ang City Development Council nga gipangulohan sa mayor gilangkoban sa tanang kapitan sa barangay ug mga Non-Government Organizations (NGO), ingon man ni Konsehal Margot Osmeña nga naglingkud isip pangulo sa Committee on Budget and Finance.
Matud ni Mayor Rama nga ang mga proyekto nga giduso sa CCDC nagagikan gayud sa katawhan kay ang maong kahugpongan gilangkoban man sa mga kapitan ug sa lainlaing NGO’s.
Si City Administrator Jose Marie Poblete miingon nga ang AIP maoy ilang basihan pagpreparar sa Annual Budget kun unsa nga mga proyekto ang hatagan og prayoridad. (/EIM) (BANAT NEWS)
- Latest
