Mga infra project ibutang sa billboard

CEBU, Philippines - Giawhag sa Commission on Audit (COA) ang mga opisyal sa dakbayan sa Sugbo nga kun magmugna sila og infrastructure project ila kining butangan og billboard nga magmantala og detalye kabahin sa maong proyekto.

Ang mga kawani sa COA nga misusi sa mga “ongoing projects” nga gipatuman sa dakbayan sa Sugbo  sa lainlaing barangay nakabantay nga wala tumana sa mga kontraktor ang gilatid sa lagda.

Matud ni Delia Monte de Ramos, ang supervising director sa COA nga alang sa mga local government units, kinahanglang butangan gayud og billboard nga magbutyag sa mga detalye sa proyekto aron mahibaw-an kini sa publiko. Ang mga detalye maglakip kun unsa ang gimugna nga proyekto, kinsa ang nag-ugmad sa project, pila ang kantidad sa mao nga proyekto, kanus-a magsugod ug kanus-a mahuman ang project ug uban pa.

Kun ang proyekto maglambigit og pagpatukod og mga building o kaha tulay magkinahanglan nga ibutang sa billboard ang numero sa permit nga gihatag gikan sa Office of the Building Officials.

Ang COA mipagawas niining pasiuna nila nga “findings” isip kabahin sa pagpahigayon na nila og pakisusi nga maoy sumbanan nila sa paghimo sa Annual Audit Report karong tuiga.

Matud ni Monte de Ramos nga sa unang walo ka infrastructure projects nga gihimoan nila og pakisusi ang unom niini wala butangi og billboard nga magtug-an sa publiko kun unsa kini nga proyekto.

Apil sa ibutyag diha sa billboard kun diin ang budget nga gigasto sa proyekto – kun gikan ba sa dakbayan o kaha sa nasudnong kagamhanan. (/WC) (BANAT NEWS)