Mga motor sa impounding area gihimulbolan?

CEBU, Philippines - Hepe sa Talisay City Police Station ipatawag sa Konseho sa Talisay City tungod sa report nga gipanghimulbolan ang mga nadakpan ug gi-impound nga mga motorsiklo diha sa ilang buhatan.

Ang chairman sa Committee on Police Matters sa Konseho sa dakbayan sa Talisay nga si Konsehal Danny Caballero naglaraw sa pagpatawag ni Supt. Resty Santos. Si Caballero nagkanayon nga gusto niyang mahibaw-an ang kamatuoran sa maong report ug kung nganong nahitabo kini.

Ang Konsehal nanawagan sa mga tawong nasakmitan og motorsiklo nga na-impound sa police station aron paghatag og kasayoran bahin sa maong isyu aron dunay himuong imbestigasyon kung tinud-anay man kini.

Gituohang sa pag-impound sa maong mga motor, running condition ug nagamit pa kini sa mga     nagdala niini, apan karon ang uban dili na gani makadagan.

Hinuon si Santos kinsa gikahinabi sa Banat Manobela sayo ning semanaha miingon nga upat pa siya ka buwan nga milingkod isip OIC sa TCPS.

Matud niya diha nang daan ang nahisgutang mga motor ug gani ang uban niini paingon nang madugta tungod sa uwan ug init.

Midugang si Santos nga wala na mopakita ang mga tag-iya sa maong mga motor ug gani gikuhaan nila kini og chassis ug engine numbers ug gisumitir nila sa Land Transportation Office (LTO) aron masubay kinsay mga tag-iya niini.

Kahinumduman nga mikabat sa 20 ka mga motorsiklo ang naa karon sa impounding area kilid sa building sa TCPS.

Dugang ni Santos nga sa karon kung duna silay ma-impound nga motorsiklo ilahang kuhaan og hulagway ang motor ug drayber niini.

Ang motorsiklo nga ma-impound nila karon iuli dayon nila kini kung ang mangangkong tag-iya makapakita og mga dokumento. (/EIM) (BANAT NEWS)