DENR miawhag basura atimanon

CEBU, Philippines - Giawhag sa buhatan sa Department of Environment and Natural Resources (DENR) 7 ang mga molupyo sa nagkadaiyang  barangay sa Sugbo  sa dili pagpataka og labay  sa basura   ngadto  sa  mga kanal aron kalikayan ang pagkabara sa   tubig  niini nga maoy hinungdan sa baha.

Padayong  gipahinumdom  sa  DENR  nga ang madunot nga  basura mao kadtong papel, biya sa mga utanon, prutas ug uban pa, ug ang dili madunot nga basura mao kadtong plastic, botelya,   buhok, putos sa shampoo, candy ug uban pa.  Ang  maong   awhag   gihimo  sa DENR 7  human sa nahitabo  sa Metro Manila  ug sa Negros Oriental nga nakaingon sa kamatayon sa pipila ka tawo nga naglakip sa usa ka polis nga babaye.

Si Dr. Isabelo Montejo, direktor sa DENR 7 miingon nga dili lang ang  ulan   maoy  makaingon sa pagbaha kun dili lakip na usab ang daghang basura nga   dili  madunot  sama  sa  plastic  nga  mobara  sa  mga  kanal .

Dugang pa niya nga  gikinahanglan usab nga ang kumunidad magmabinantayon   bahin sa  pagpataka  og labay sa  basura  ngadto  sa mga kanal.

“We should bear in mind that each of us shares a certain degree to the problem of flooding as garbage eventually ends up our streets and waterways,” nagkanayon si Dr. Montejo sa iyang pamahayag.

Higpit  nga  gipahinumdom ni  Dr. Montejo  ang  bahin  sa  kamahinungdanon sa maayong pagpatuman sa solid waste management program sa kagamhanan. (/WC) (BANAT NEWS)