Kapitan navarro moreklamo vs konseho

CEBU, Philippines - Mibahad nga mopasaka og reklamo ngadto sa Ombudsman for the Visayas sa sunod semana si Punta Princesa barangay captain Jose Navarro batok sa Konseho sa siyudad tungod sa pagpadumala nila sa propiyedad sa gobiyerno ngadto sa usa ka pribadong grupo.

Si Navarro nga nakahinabi sa Banat News sa telepono nagkanayon nga isip end-user ug maoy gisangunan sa balaod sa responsibilidad pagdumala sa maong covered court sa sitio Manggahan, Punta Princesa, mosang-at sila og reklamo karong sunod semana.

Niadtong adlaw nga Miyerkules ang Konseho mipasar og ordinansa human sa botasyon nga naghatag sa Punta Princesa Manggahan Homeowners Association,Inc. og awtoridad nga modumala sa maong covered court.

Matud pa ni Navarro nga mihimo og ordinansa ang Konseho tungod kay nasayod silang dili balaod ang resolusyon nga gimugna nila niadtong 2009 nga nagtugot sa maong homeowners nga modumala sa maong covered court.

“Bisan klaro kaayo ang balaod. Ang ilang resolusyon sa 2009 di man balaod, karon gihimo nilang balaod. Bisan dili gyud mahimo tungod sa diktar sa ilang amo,” matud pang Navarro. Si Navarro mao ang labing bug-at nga kritiko ni kanhi Kong. Tomas Osmeña sa Bando Osmeña Pundok Kauswagan. Samtang ang katorse ka mga konsehal nga mipasar sa maong ordinansa pulos sakop sa BOPK.

Matud pang Navarro nga duna nay suwat ang Department of Public Works and Highways nga nag-turnover sa maong covered court ngadto sa dakbayan ug karon ang barangay isip end-user mao gyud pinasubay sa balaod ang padumalaon ug dili ang pribadong tawo o grupo.

“Dili man na mahimo nga ang butang sa gobiyerno, pribado ang modumala. Kung di ko mo-insister, kami say madaot,” sumala pa sa barangay kapitan. Dugang pa niya nga nalapas sa mga konsehal ang Anti-Graft and Corrupt Practices Act ang gihimo sa maong mga konsehal. Ang RA 7160 nag-ingon nga ang tanang mga edipisyo, estraktura kinahanglang anaa sa ilawom sa ‘accountability’ sa mayor.

Nagtuo si Navarro nga ang iyang reklamo ma-elevate ngadto sa Sandiganbayan tungod kay ang mga konsehal nasakop sa “salary grade 27” diin ang maong opisyal o kawani sa gobiyerno nga gireklamo adto sa mas taas nga hurisdiksyon husayon ang kiha.

Si Mayor Michael Rama daan nang mipahibalo nga iyang idangop sa korte ang maong isyu tungod kay alang kaniya dili mahimong ipaagi lang sa botasyon ang maong isyu bisan supak sa balaod.

“Naa na sa mayor kung unsay iyang buhaton, basta kami amoa ning buhaton (pagreklamo),”  pasabot pang Navarro. (BANAT NEWS)