Bantayanan barangay sa CV nadungagan — Labra

CEBU, Philippines - Gihulagway nga malampuson ug malinawon ang unang adlaw sa pag-file sa Certificate of Candidacies (COC’s) kagahapong adlawa. Si Chief Inspector Romeo Santander ang hepe sa City Intelligence Branch (CIB) sa Cebu City Police Office (CCPO) miingon nga wala siya makadawat og taho nga may kagubot may kalabotan sa kalihokan kagahapon.

Samtang ang Police Regional Office 7 (PRO-7) mipahibalo nga nahimo nang 44 gikan sa 29 ka mga barangay sa Central Visayas ang ilang girekomendar nga ipaubos sa Election Watchlist Areas (EWAS).

Si Supt. Paul Labra II, ang hepe sa Regional Intelligence Division (RID) miingon nga ang maong mga barangay naglangkob sa 11 sa lalawigan sa Sugbu, usa sa dakbayan sa Lapulapu, 28 sa Negros Oriental, usa sa Bohol ug tulo sa lalawigan sa Siquijor.

Samtang gi-monitor pa gihapon ang presensya sa mga armadong grupo nga nasigpatan sa lungsod sa Balamban, Ronda ug sa dakbayan sa Bogo. Si Labra miingon nga ang mga barangay nga gipaubos sa watchlist mamahimong mapun-an pa o makuhaan depende sa assessment  nga ilang himoon sa dili pa moabot ang eleksyon.

Mitug-an si Labra nga wala usab silay nadawat nga report gikan sa mga bukiran nga mga barangay nga dunay mga rebeldeng pundok nga nangayo og bayad aron hatagan og permit to campaign ang mga kandidato.  (BANATNEWS)