DENR mag-monitor sa campaign materials

CEBU, Philippines - Ang mga kadagkuan sa Department of Environment and Natural Resources kon DENR 7 mo-monitor usab sa mga kandidato sa barangay elections tungod sa pagpataka og pamutang og mga campaign posters sa mga punoan sa kahoy.

Sumala pa sa tigpamaba sa DENR 7 nga si Ed Llamedo nga aduna sila’y kamanduan nga gipangapod-apod ngadto sa mga Community Environment and Natural Resources Office  kon CENRO ug Provincial Environment and Natural Resources Office kon PENRO nga monitoron ang mga kabarangayan kun wala bay mga kahoy sa nga gilansangan ug gibutangan og mga campaign materials sa mga kandidato.

Iyang giklaro nga dili magpanuko ang ilang buhatan sa pagpasaka og kaso batok sa mga kandidato nga nakalapas sa nahisgutang  balaod.

Pasakaan gihapon sila og kaso  bisan pa man og dili sila maoy nangunay og lansang sa mga campaign posters ngadto sa mga kahoy. (BANATNEWS)