Babayeng “masiao coor-dinator” nadakpan sa IDMB

CEBU, Philippines - Usa ka gipasanginlang masiao coordinator ang nadakpan sa mga sakop sa Investigation and Detection Management Branch (IDMB) sa Cebu City Police Office  diha sa sitio Kana-as barangay Guadalupe sa dakbayan sa Sugbo sa alas 8:00 sa miaging gabii.

Ang nasikop naila nga si Rosalinda Caballes, 50, molupyo sa maong dapit ug giila nga usa ka satellite coordinator.

Matud pa sa kasayoran nga nakuha sa IDMB pinaagi ni Chief Insp. Jesus Arong duna sila’y  nadawat nga report kabahin sa kalihokan sa suspek maong dihang ilang gisusi naaktohan nilang nagkwenta kini sa abot sa masiao.

Si Caballes wala mohimakak sa alegasyon batok kaniya apan iyang gikwestyon nganong silang mga gagmay ra ang initan sa kapolisan ug dili ang mga bigtime financiers ug mihagit sa mga polis nga mas maayo pang ilang puohon ang  problema sa illegal drugs.  (BANAT NEWS)