Comelec-7 mag-revamp; filing sa COCs karong adlawa

CEBU, Philippines - Magpahigayon ang Commission on Election (Comelec) ug ang Police Regional Office (PRO-7) og lahugay karong adlawa aron kalikayan ang pamasangil nga bias ang mga empleyado niini sa umaabot nga piniliay sa barangay.

Karong adlawa magsugod ang filing sa certificates of candidacies            (COCs).

Si Atty. Temmie Lambino ang Comelec Regional Director miingon nga mokabat sa  20 hangtod sa 30 ka mga election officers ang maapektahan sa maong lahugay.

Matud ni Lambino nga ang kompletong listahan sa mga ngalan sa mga maapektahan sa maong lahugay mahibaw-an sa sunod nga semana human nga maila na nila ang mga kandidato.

Maapektahan gyud ang mga election officers kun duna kini mga paryente nga molansar sa piniliay sa barangay sumala pa ni Lambino. “This is to avoid accusation of being biased,” matud ni Lambino.

Apan gitataw ni Lambino nga ibalik ra pud sa ilang mga pwesto  human sa piniliay.

Samtang si Supt. Paul Labra, sa Regional Intelligence Division (RID) miingon nga duna say mga polis nga kasamtangang ibalhin sa laing lugar tungod sa susamang rason.

Duna nay onse ka mga barangay nga anaa sa watchlist sa probinsya sa Sugbo, ug siyam usab sa dakbayan sa Sugbo.

Gawas niana gibana-bana nga dunay 28 ka barangay ang angayan nga tan-awon sa Negros ug Siquijor.

Giawhag ni Labra ang mga kandidato nga dili unta moresulta og physical nga kagubot ang ilang panagribal sa piniliay. (BANAT NEWS)