Misaka sa tower

CEBU, Philippines - Usa ka lalaki ang misaka sa 200 ka tiil nga tower sa Cebu Development Energy Corporation sa kuryente ug wala mokanaog kung wala maabot ang live-in partner niini nga mibiya na kaniya kagahapon sa buntag.

Ang insidente makapanimbawot balahibo tungod sa kahabugon sa maong tower ug live usab ang high tension wires nga nagkutay niini diha sa sitio Suba barangay Talavera sa dakbayan sa Toledo.

Si SPO4 Carmelito Hornales nga nahinabi sa Banat News miila sa maong lalaki nga si Rocky James Trinidad Codino, 19, lumolupyo sa samang barangay.

Matud ni Chief Insp. Michael Anthony Bastes ang hepe sa Toledo City Police Station nga mikatkat ang maong lalaki pasado alas 6:00 sa buntag kagahapon ug milanat pa og kapin duha ka oras   dihang nakit-an na niya ang iyang live-in partner nga mibiya kaniya sud na sa napulo ka adlaw.

Si Bastes sa pakighinabi sa Banat News nagkanayon wala gyud manaog si Codino bisan giunsa nila og kombinsir kini gani ang amahan, inahan ug iyaan niini miapil og kombinsir kaniya apan wala gyud manumbaling si Codino.

Matud ni Bastes nga iyang gipapangita ang live-in partner ni Codino nga si Jocelyn Yonting aron makombinsir kini gani siya pa mismo ang mihatag og plete nga P500 sa drayber sa habal-habal. Sumala pa ni Bastes nga dihang naabot na ang live-in partner niini ilang gipabantang sa nahimutangan ni Codino aron makita gyud niya kini ug ilang gihangyo nga mokanaog kini.

Si Codino pagkakita kang Yonting daling mikanaog sa walay paglangan ug pag-abot sa ubos dali siyang gidala sa mga medical personnel sa Toledo City District Hospital aron masusi kini apan matod ni Bastes nga mihatag og referral ang maong hospital nga ipadala kini sa dakbayan sa Sugbo.

Miingon si Bastes nga iyang huwaton kung unsa ang resulta sa gihimong eksaminasyon sa hospital kabahin sa kahimtang ni Codino kung kinahanglan bang pasakaan kini og kaso.  (BANAT NEWS)