Kabataang kabus angay tabangan — DSWD

CEBU, Philippines - Ang Department of Social Welfare and Development sa Central Visayas (DSWD-7) midasig sa mga magpapatigayon nga mutampo sa pagpaminus sa kakabos sa  mga  molupyo.

Kini  pinaagi  sa papasiugda og  mga panukdanan alang sa pagsulbad sa problema sa pagpahiuli  sa kahimtang  sa matag  pamilya. Matud pa ni DSWD-7 Regional Director Mercedita Jabagat nga ang kakabos sa mga kabataan resulta kini sa kalisod sa kahimtang sa ilang pamilya.

Midugang siya   nga ang insidente sa kakabos sa pamilya padayon pang misaka pag-ayo ug nga nagkadaghan ang kabataan nga ahaw sa ilang batakang pangina-hanglan .

Gani  may  mga kabataan  nga  napugos na hinoon sa pagpanarbaho bisan linghod pa ang ilang pangedaron.

“These children will eventually be exposed to exploitation and abuse and it could greatly affect their growth and development,” kini dugang pa ni Jabagat.

Gipadayag ni Jabagat nga pinaagi sa pagtabang sa mga nagkadaiyang magpapatigayon, masolusyonan gilayon kining maong senaryo ug nga mahatagan ang mga kabos nga bata og maayong dignidad sa pagpakabuhi.

Ang bulan sa Oktubre gideklarar nga National Children’s Month diin aduna kini tema nga “Kahirapan Wakasan, Karapatan ng Bata Ipaglaban!” diin gihatagan og dakong pagtagad ang pagpaminus sa kakabos sa mga bata.

Sa samang  higayon   gitinguha ang hiniusang kusog sa nagkadaiyang lebel aron matubag ang mga posibleng hinungdan sa kakabos.       

Gisaysay usab ni Kerwin Macopia, usa sa mga tigpamaba sa DSWD-7 nga aduna sila'y nagkadaiyang aktibidad sama sa poster-making, modelling clay sculpture, fabric painting lakip na ang round table discussion nga nag-uluhan og “Poverty Reduction Starts with Children”.       

Gibutyag ni Macopia nga ang ilang selebrasyon pagatapuson pinaagi sa Regional Children’s Contest nga pagasalmotan sa mga tinun-an sa Day Care nga nagagikan sa nagkalain-laing syudad ug munisipalidad sa Central Visayas. (BANAT NEWS)