Tresurera mihimakak nga miwaldas sa kapin P1M
CEBU, Philippines - Mihimakak nga sad-an ang kanhi tresurera sa barangay Zapatera ning dakbayan sa Sugbo atol sa gipahigayong hearing niadtong Martes didto sa sala ni RTC-7 Judge Alexander Acosta.
Si Maria Carissa Polotan kanhi treasurer sa barangay Zapatera wala muangkon sa kasong malversation of public funds.
Pormal na nga gisang-at sa buhatan sa Visayas Ombudsman ang kasong malversation of public funds batok ni Polotan tungod sa kapakyas sa pagtugyan sa pundo sa barangay nga mobalor og kapin sa usa ka milyon ka pesos.
Ang maong kaso giaprobahan ni Deputy Ombudsman for the Visayas Pelagio Apostol nga mibase sa reklamo nga giduso sa Commission on Audit ( COA)-7.
Sigun sa maong sumbong, si State Auditor Francisca Jumao-as nagkanayon nga mipahigayon siya og examination sa cash ug account sa treasurer sa barangay Zapatera gikan sa Enero 1, 2007 hangtud sa Marso 24, 2009.
Didto natataw niya ug nakita nga nahanaw ang P1,273,580.64.
Sumala pa niya nga iyang gihatagan og kahigayonan ang akusado sa pagpangita ug sa pag-uli sa maong kwarta apan bisan pa man niini wala gyud kini mibayad sa maong kantidad. (BANAT NEWS)
- Latest
