Mga babaye pabantayon sa breast cancer

CEBU, Philippines - Mipasidaan ang  mga doktor  sa kagamhanan kagahapon  sa  mga  kababayen-an bahin  sa sakit  nga  breast cancer, nga usa sa mga nag-unang  kamatayon  sa tawo.

Sa tulumanon AGIO Forum nga gipahigayon didto sa buhatan sa Department of Health Regional Office-7 (DOH-7) kagahapon, si Dr. Benjamin Auguis, general  surgery head  sa Vicente Sotto Memorial Medical Center (VSMMC) miingon  nga  wala’y nasayud  bahin  sa sinugdanan  sa  breast cancer kon  sakit  sa suso  sa babaye.

Matud  ni  Dr. Auguis  nga  wala’y  nakatuki  unsay  sinugdanan  niini,  busa silang  mga  doktor igo  lang  motambal  kun ang  maong  sakit  bag-o  pang  mitapot  sa lawas  sa pasyente.

Samtang  si Dr. Saheshe Tracy Anne B. Fernandez,  in-charge  usab  sa Breast cancer clinic  sa VSMMC mibutyag  nga  nagsaka  karon  ang  gidaghanon  sa  mga  masakiton  og  breast  cancer.

Base  sa iyang  record,  gikan sa tuig 2010  nga  mikapin  lang  sa  2,000  ang  pasyente  sa maong tuig,  misaka  kini  ngadto  sa 3,000  sa mga  tuig  2,011 ug 2012.

Gani  ning  tuiga  nga wala  pa  matapos,  nakalista  na siya  og  himabaw  nasa  3,000  ka  pasyente  ang  mikonsulta  sa klinika sa gobiyerno.

Kini  wa pay  labot  sa mga  nagpakonsulta  sa maong  sakit  sa nagkalainlaing  tambalanan  sa  lalawigan.

Apan  miingon  siya  nga wala  na  nila  hisayri  kun  pilay  nangamatay  sa maong  mga  pasyente  tungod  kay kasagaran  sa magpakonsulta  kanila  dili na  mobalik.

Midugang  siya  nga  adunay  upat  ka stages  ang  breast  cancer  diin  ang  stage 1 mao pay paglusay, stage 2, dako-dako na ang  lusay  sa palibot sa totoy, stage 3 klaro na  kaayo  ang  maong  bugon, ug  ang  stage  4 mamuto  na  ang  maong  lusay  busa  baho  nga  kini sa nana.

Matud pa  ni  Dr. Fernandez  nga  ang stage 3 ug stage 4 lisud  na  hidutlan  og  tambal  busa  dili  na  kini  maayo.

Lahi  sa stage  1 ug stage  2  nga  mokupos  pa  kun  madapatan  sa tambal  ang  maong  mga  lusay.

Gisukit kun  may  epekto  ba  sa  breast cancer  ang  pagkupay  sa  hinigugmang  lalaki  sa  totoy  sa babaye,  si Dr. Auguis  miingon  nga wala tungod  kay way nasayud bahin  sa sinugdan  ug  hinungdan  ning  maong  sakit.

Ila  lang  giawhag  ang kababayen-an  nga  mopaubos  gyud sa   binuwan  nga  check-up  sa ilang  dughan. (BANAT NEWS)