Coastal highway tukoron sa Mandaue

CEBU, Philippines - Pormal nga gipahibawo sa kagamhanan sa syudad sa Mandaue nga motukod kini og coastal highway.

Kini aron may alternatibong highway nga maagian sa mga sakyanan gikan ug moapingon sa amihanang bahin sa lalawigan sa Sugbo. Si Mayor Jonas Cortes nitugyan sa ilang gisugyot nga coastal highway project sa syudad sa Mandaue atol sa gipahigayon nga Regional Development Council (RDC-7) meeting sa miaging  adlaw.

Ang mayor mipakita sa maong proyekto aron ang kagamhanan sa syudad sa Mandaue katabangan sa kagamhanang national.

Matud  pa  sa  mayor  nga ang kaayohan sa maong proyekto mao nga maibanan ang mga sakyanan nga moagi sa kinapusorang bahin sa Mandaue city ug maluag-luagan ang trapiko sa syudad.

Matud pa sa mayor nga dili lang ang dakbayan sa Mandaue ang apektado sa nasinating problema sa trapiko kundi lakip na usab ang tibuok probinsiya sa Sugbo gumikan kay ang syudad mao may agianan sa mga sakyanan nga mosulod-gawas sa Sugbo ug mopaingon sa amihanan.

Sumala  sa ilang  gilaraw  ang maong coastal highway magsugod sa barangay Subangdaku paingon sa Tipolo, Mantuyong hangtud na sa katapusang Coastal Barangay sa Mandaue nga mao ang barangay Jagobiao.  Dugang pa sa mayor nga ang iyang giplano  nga  magpakitabang usab sa academe  sa paghimo unya og feasibility studies sa maong proyekto. (BANAT NEWS)