Capute miangkon membro siya sa robbery group

CEBU, Philippines - Miangkon ang usa sa mga  tulisan nga nasikop sa dakbayan sa Danao nga membro  siya  sa usa ka robbery group.

Kini human siya ug ang  iyang  kaubang tulisang namatay sa ilang  pagsukol og  pinusilay  batok  sa  mga   elemento sa Provincial Intelligence Branch sa miaging  adlaw.

Matud pa ni Guillercito Capute nga membro siya sa Harold Barbero Robbery Group nga responsabli sa pipila ka tulis sa dakbayan ug lalawigan sa Sugbo.

Basi sa imbistigasyon nga gihimo sa PIB nga si Capute ug si Bobby  Godinez ang responsable sa tulis sa La Carmona Mini Mart sa lungsod sa Compostela sa alas 6:30 sa gabii niadtong Oktubre 1.

Nailhan ang duha tungod kay  nakuha ang  ilang  mga  dagway  sa   Closed-Circuit Television (CCTV) sa maong tindahan. Ang  duha giingong   nagpakaaron-ingnon nga customer apan kalit  lang mitulis  sa  tag-iya  sa maong tindahan.

Nakita sa  CCTV footage nga  migamit  sila  og  mga   high powered nga armas.

Nasakmit  gikan sa mga suspetsado sa ilang pagkasikop ang duha ka kalibre 45, usa ka granada, ug duha ka cell phone.

Nabawi  usab sa kapolisan ang sinina nga gisul-ob sa mga suspetsado dihang ilang gitulis ang La Carmona Mini Mart.

Nasikop ang duha sa balay nga ilang giabangan sa alas 8:30 sa buntag niadtong Sabado didto sa dakbayan sa Danao human kini nakigpinusilay sa kapolisan hinungdan sa kamatayon ni Godinez. Si Godinez matud pa sa kapolisan usa ka ex-convict sa kasong murder ug maoy kauban ni Capute dihang gitulis nila ang La Carmona Mini Mart.

Si Capute mag-atubang sa nagpatong-patong nga kaso niya sa pagpanulis, pakigpinusilay sa kapolisan ug pagtinir og armas bisan may gun ban.  (/WC) (BANAT NEWS)