Kapin 200 ka drayber mi-surrender sa CITOM

CEBU, Philippines - Miabot na og 201 ka mga drayber sa taxi ug Public Utility Vehicle ang boluntaryong mitahan sa City Traffic Operations Management (CITOM) tungod kay nasayod silang duna sila’y mga traffic violations ug nabalakang madakpan sa kadugayan pinasikad sa warrant.

Matud ni Joy Tumulak ang operations chief sa CITOM giunhan sa maong mga drayber ang CITOM tungod kay nahibalo man sila nga ipasaka na sa korte ang ilang mga kaso.

Sumala pa ni Tumulak nga padulong na unta ipasaka sa CITOM ang kaso sa sala ni Judge Monalisa Tecson sa Municipal Trial Court in Cities sa maong mga drayber apan nakabayad kini sila og tag dos mil pesos nga compromise penalties.

Human nga nakabayad ang maong mga drayber sa multa dili na sila pasakaan og kaso sa CITOM ug mo-file na lang kini og affidavit of desistance. Miingon si Tumulak nga mominos na unya ang mga kaso nga naa sa sala ni Judge Tecson tungod sa mga drayber nga mitahan.

Niadtong miaging semana dunay duha ka mga drayber nga taga Mandaue nga mibisita sa buhatan sa CITOM aron sa pagsusi kun duna ba sila’y kalapasan ug nasuta sa duha nga naa gyud diay maong mibayad sila og dos mil pesos.

Mitabang sab sa pagpasaka og kaso sa mga badlongon nga mga drayber ang City Attorney’s Office ug matud ni Jerom Castillo nga ang pagpasaka og kaso sa mga drayber agi lang og pagdisiplina kanila. Gitataw ni Castillo nga dili pasakit ug paglisod-lisod sa mga drayber ang ilang gibuhat. Naaresto na ang 67 ka mga tawo nga nalutsan sa 90 ka bench warrants ug pabilin nga gipangita ang 23 nga nagtago-tago pa hangtod karon. (/EIM) (BANAT NEWS)