Mga kapitan sa brgy gibantayan sa DILG

CEBU, Philippines - Gipabantayan  sa kagamhanan ang  mga  opisyal  sa barangay nga  mogasto  sa pundo  sa barangay  alang sa educational tour.

Matud pa  ni Konsehal  Rene  Alquizola  sa lungsod  sa Barili  nga  sagad  nga  mobuhat niini  mao  kadtong  anaa  na sa katapusang  termino  nga wala  nay  laraw  nga  mokandidato  og  ubos  nga  posisyon  sa ilang  barangay  karong  umaabot  nga election.

Si Alquizola  kinsa  manghud  ni  anhing  mayor  Bobby  Alquizola  sa Barili,  napili  sa  pagka-konsehal  sa maong  lungsod  niadtong  Mayo 2013  nga piniliay.

Alang  kaniya  wala  kinahanglana  ang  educational tour  sa usa  ka  opisyal  sa  barangay  kay  ang  iyang  isuroy  sa ubang  lugar,  mas maayo  pang  ilibot  niya  sa iyang  kaugalingong  barangay  ug  sutaon  unsay  iyang  kuwang nga  wa  ikaalagad  sa iyang  konstituwente.

Hinuon  miingon  si Alquizola  nga  gipapanid-an  kining  maong  lihok  sa  Department of Interior  and  Local Government (DILG).

Kini aron  sutaon  kun  unsay  kapuslanan  sa maong  mga tour, ilabi  na  kun  ang  nanguna  niini  mao kadtong  mga  kapitan  kinsa  wala nay higayon  nga  moserbisyo  sa iyang  barangay. Miingon  si Alquizola  nga  usa  kini  ka matang  sa pag-usik-usik  sa buhis  sa katawhan  tungod  kay  kun  unsa  ang angay  tun-an  sa usa  ka kapitan  sa ubang  barangay,  ang  tanan  iya  kining  masuta sa  iyang kaugalingong  lugar.

Busa  miingon  si  Alquizola  nga  dili usab  maayo  nga  usikan  ang  buhis  sa katawhan  pinaagi  sa pagsuroy-suroy nga walay  kapuslanan.

Hinuon  daan  na  nga  giawhag  sa DILG  sa  komunidad  nga  isumbong  sa ilang  buhatan  kun  may mamatikdan  silang  mga  opisyal nga  motuyo  pag-usik  sa kuwarta  sa katawhan  pinaagi  sa paggasto  niini  sa  mga  butang  nga wala kaayo  kinahanglana. (BANAT NEWS)