Giluba sa kontra nga silingan angol

CEBU, Philippines - Naangol ang usa ka tawo human  kini  dunggaba  sa iyang  kontra   nga  silingan didto  sa barangay Poblacion, lungsod sa Cordova ala 1:00 pasado ang takna sa miaging kaadlawon.

Si  PO1 Ryan Casiban sa kapolisan sa maong lungsod miila sa biktima nga mao si  Tiburcio Inting, 47, minyo nga taga barangay Alegria sa nahisgotang lungsod.

Ang suspetsado nga nakadunggab sa biktima mao ang giila lang sa angga nga Batibot  nga giingong lumad nga taga Bohol ug temporaryo  nga nagpuyo sa barangay Cogon sa maong lungsod. 

Matud pa ni PO1 Casiban nga nahinabi sa Banat News nga daan na nga nagkaaway ang biktima ug ang suspetsado sa miaging bulan dihang nagkabikil sila samtang  naghantak sa nahisgotang dapit.

Dugang pa ni PO1 Casiban nga ang biktima ug suspetsado pulos nagbinaharay sa usa  ug usa kanila nga digoon sa kinumo ang nawong sa higayon nga subling magkatagbo ang ilang dalan.

Si PO1 Casiban miingon nga kuyog ni  Inting ang mga higala nga nag-inom sa usa ka tindahan sa maong dapit ug wala  damha   ang  kalit  nga  pag-abot  sa suspetsado.

Didto  nagsugod  dayon  ang  sinukmatay  sa usa ug  usa hangtod nga nagkasinukmagay.

Matud pa ni PO1 Casiban nga abtik molihaylihay si  Inting sa buhian nga kinumo ni Batibot  ug gikataw-an lamang ang nag-aso-aso nga kinumo niini. Sa iyang  kalagot,  naaghat  si Batibot sa pag-ibot sa giluklok niining kutsilyo ug dayong dunggab sa tiyan sa biktima.

Ang biktima nga nagsapwang sa iyang tina-i nga nayabyab  human  masabak  sa usa  ka  pagduslak , dali nga gitabang sa iyang gikainom ug gidala sa Lapulapu City Hospital.

Apan human sa paghatag og pasiunang tambal dali nilang gibalhin ngadto sa Vicente Sotto Memorial Medical  Center sa dakbayan sa Sugbo. Padayon  pang gipangita  sa  kapolisan  ang suspek  kinsa miikyas  human  sa maong  hitabo.  (BANAT NEWS)