Nadakpang lalaki nangalyas og ngalan

CEBU, Philippines - Ang nadakpan nga  lalaki  nga  nagdala og armas nga walay  lisensya didto sa barangay Tabunok, dakbayan sa Talisay  sa miaging Sabado, nangalyas  og ngalan, matud ni Senior Inspector Al Pascual, deputy sa Talisay City Police Station.

Si Sr. Insp. Pascual nga nahinabi sa Banat News kagahapon mibutyag nga sa ilang follow up nga imbestigasyon nasuta nga ang tinuod nga ngalan ni "Arthuro Nolasco Fiel" "Aaron D. Fiel" diay, apan wala pa makuha sa mga polis kung unsa ang "D" sa middle initial niini.

Ang suspetsado taga sitio Bakay, barangay Tulay lungsod sa Minglanilla

Si Aaron nasikop  sa mga polis  kinsa nakadawat  og  report bahin   sa giingong  armadong  tawo (nga mao siya  si  Aaron)  nga  nagsakay  og  motorsiklo.

Si Aaron naimbargohan og usa ka kalibre .22 magnum revolver nga dunay tulo ka buhing  bala, wig nga kolor itom ug patsikurno. Gibutyag ni Pascual nga ang gigamit nga ngalan ni Aaron sa una nilang imbestigasyon ngalan sa iyang maguwang.

Si Aaron giingong sakop sa Alpha Kappa Rho fraternity ug giingong nakapusil patay kini didto sa lungsod sa Minglanilla niadtong tuig  2006 kansang   biktima   ginganlan og "Rochelle".

Gibutyag ni Pascual nga sa ilang pakisusi  nasuta  nga si Aaron  menor de edad pa dihang nakabuno  kini apan napriso sulod sa upat ka tuig  didto sa Second Chance sa barangay Kalunasan, dakabayan sa Sugbo.

Matud ni Pascual nga gawas sa kasong kalapasan sa Comelec gun ban ug illegal possession of firearms, pasakaan usab nila og kaso gumikan  sa pangalyas  niini   sa Talisay City Prosecutors Office. (BANAT NEWS)