Barbecue grill gireklamo kay pwerteng lanoga sa videoki
CEBU, Philippines - Usa ka barbecue grill nga nahimutang duol sa Doña Rita Village sa Banilad ang hayan pasirad-an sa City Hall kun ang tagdumala niini mapakyas paghimo’g paagi nga dili makadisturbo ang ilang videoke.
Ang mga kawani sa City Treasurer’s Office mihimo na og pakisusi sa reklamo sa mga opisyal sa mao nga village ug namatud-an nila nga tinuod ang kasaba panahon sa kagabhion gikan sa maong kan-anan.
Matud sa mga opisyal sa Doña Rita Village Residents Association nga gipangulohan ni Fortunata Po nga pwerte’ng sabaa g’yud panahon sa gabii kay ang mga mokanta sa videoke magsige’g katawa ug kusog kaayo ang tukar.
Sa pag-inspection sa mga kawani sa City Hall nakita nila nga ang gibutangan sa video karaoke wala gibungbongan aron unta dili mogawas ang tingog nga nakalapas sa lagda sa Anti-Noise Ordinance.
Matud sa mga konsehal sa dakbayan sa Sugbo nga kun ang maong balay-patigayon wala makatuman sa balaud angay kini nga silotan ug dili sila mosupak kun pasirad-an. (BANAT NEWS)
- Latest
