CITOM nagpatabang sa DOTC sa pag-repairs sa traffic lights

CEBU, Philippines - Ang kagamhanan sa dakbayan sa Sugbo pinaagi sa kadagkoan sa City Traffic Operations Management (CITOM) miawhag na sa Department of Transportation and Communications (DOTC) nga gastohan ang pagpaayo sa mga gubaong electronics traffic control diha sa mga karsada.

Ang gitawag og SCATS kon Sydney Coordinated Automatic Traffic System nga giinstalar diha sa mga dagkong eskena sa dakbayan sa Sugbo kapin sa 20 ka tuig na ang nakalabay, kadaghanan niini mga gubaon na ug wala na motrabaho.

Matud ni CITOM Board Chairman Ruben Almendras nga ilang gisugyot nga ayuhon lang usa ang maong mga traffic censors nga gibutang sa 78 ka “major intersections” kay mas dali kini ug mas barato pa kay sa magpataud og bag-o g’yud nga kahimanan.

Gibana-bana ni Almendras nga mogasto og mga P163 milyones ang pag-ayo sa maong mga traffic censors apil ang pag-supply daan og kahimanan aron magamit kun adunay maguba. Gipasabot ni Almendras nga kun magbag-o g’yud og traffic censors mangita pa og budget, unya malangan pa   gayud pagpahigayon sa bidding.

Wala pa hinoo’y tubag gikan sa kadagkoan sa DOTC kun uyonan ba nila ang maong awhag sa CITOM nga sila maoy mogasto sa pagpaayo sa mga gubaong traffic censors sa dakbayan.  Ang maong mga automatic traffic censors maoy mohatag og signal ngadto sa ubang traffic signal lights aron nga dili magkaputol-putol ang dagan sa mga sakyanan.

Pagkakaron makita nga magsiga gihapon ang mga traffic signals apan dili na kini “coordinated” sa usa’g-usa mao nga dili kini makapakusog sa dagan sa mga sakyanan.  (BANAT NEWS)