DSWD manawat og enumerator

CEBU, Philippines - Padayon nga nanawat  ang  Department of Social Welfare and Development (DSWD)  sa  mga  enumerator alang  sa  ilusad nilang  ikaduhang hugna  sa Listahanan.

Matud pa  ni  DSWD7 Information Officer Aileen Lariba, nga ang Listahanan  maoy terminolohiya  sa talaan  sa  pamilyang  hatagan  og  ayuda  sa kagamhanan  isip membro  sa Pamilyang Pilipino  Pantawid Program (4Ps). Miingon  si Lariba  nga  mokabat  sa dul-ang 2,000  ang  mga  enumerator  nga  ilang  patrabahoon  sa pagpang-interview  sa  mga  molupyo  nga  matawag  nga  poorest  of the poor  o  labing  kabus  sa mga  kabus dinhi sa Central  Visayas.

Ang  kalipikasyon  sa  ilang  dawatong enumerator  mao  kadtong  labing  ubos  second year college, may pamarug, maayo  makig-atubang  og  tawo  ug  may  igong  hiantigohan.

Ang pagpanglista  ug  pag-interview sa  kalipikadong  mga  pamilya  sugdan  unya sa Enero  sa sunod  tuig.

Miingon  si  Lariba  nga  may  sukdanan  sila  sa kahimtang sa matawag  nga  labing  kabus  sa mga  kabus  nga  pamilya. Kini  maoy  extension  sa  programa  nga  4Ps  diin  ilakip  na  ang  may  anak  nga  nag-edad  og  14 kutob 18 ang edad, sumala  ni  Lariba.   Midugang  siya  nga  ang unang  hut-ong  sa 4Ps  mograduwar  na  karong  Disyembre ning tuiga.  (BANAT NEWS)