Armadong tawo nasikop sa kapolisan
CEBU, Philippines - Nagtingkagol sa Talisay City detention cell ang usa ka lalaki human kini masakpi sa mga polis nga nagdala og pusil didto sa barangay Tabunok, dakbayan sa Talisay kagahapon sa kaadlawon.
Si Arthuro Fiel, 25, taga sitio Bakay, barangay Tulay, lungsod sa Minglanilla mag-atubang og kasong illegal possession of firearms ug kalapasan sa Comelec gun ban. Naimbargo sa mga polis gikan ni Fiel ang usa ka kalibre .22 magnum revolver nga adunay tulo ka mga buhing bala, usa ka hair wig nga kolor itom ug usa ka nickel brass knuckles o ‘pitsakurnoâ€.
Ang kapolisan nakadawat sa sayo og report gikan sa usa ka tawo didto sa maong lugar bahin sa armadong tawo nga nagsakay og motorsiklo sa national highway sa Tabunok.
Ang mga polis gipangulohan ni Senior Inspector Al Pascual daling miresponde sa maong report hinungdan sa pagkasikop sa suspetsado.
Si Pascual nga nahinabi sa Banat News kagahapon mibutyag nga ang drayber sa motorsiklo wala makapakita og dokumento sa iyang motor hinungdan nga gipa-impound niya kini ngadto sa traffic division.
Apan wala na lang nila sikopa ang drayber niini tungod kay wala man sila’y na-recover nga mga ilegal nga butang.
Gihimakak usab niini nga kaila sila si Fiel kinsa matud pa niya nga igo lamang kining misakay kaniya isip pasahero.
Ang Banat News misusi sa traffic division kagahapon apan walay naka-blotter nga na-impound nga motorsiklo sa nahisgutang oras. Dugang ni Pascual nga gisusi nila karon ang background ni Fiel. (BANAT NEWS)
- Latest
