Gibalibarang makig-sex bana nangulata busa gikiha

CEBU, Philippines - Pormal nga gipasaka sa usa ka asawa ang kasong pagpanagmal batok sa iyang kaugalingong bana sa syudad sa Mandaue human kini kulataha tungod lamang sa iyang pagbalibad nga makig-sex sa bana.

Ang gipasakaan og kasong kalapasan sa R.A. 9262 kon Anti-Violence Against Women and Their Children Act mao si Boy (di tinuod niyang  ngalan), lumad nga taga Opao syudad sa Mandaue.

Ang biktima nga si Shiel (di tinuod nga ngalan), , lumad nga taga Opao syudad sa Mandaue ug trabahante sa usa ka law firm sa syudad, niasoy ngadto sa  Opao Police Station nga wala na siya makaagwanta pa sa pagmaltrato sa iyang bana.

Si PO1 Daesy Pereño sa Women and Children's Protection Desk sa Opao Police Station nagkanayon nga ang biktima niasoy nga niadtong Mayo 8, 2009 miabut ang iyang akusadong bana nga hubo ug namugos nga makig-sex kaniya apan nasuko kini dihang gibalibaran sa biktima.

Mao usab kini ang hinungdan nga gisukmag ang nawong sa biktima.

Ang biktima midagan  pahilayo sa ilang balay apan gigukod kini sa bana nga nagsakay og motorsiklo ug gidasmagan pa kini nga nagsiyagit nga buot patyon ang biktima. Sigun sa maong polis nga mibalik sa pagpakitabang ang biktima niadtong bulan sa Septembre human ang akusado nagdumili na sa paghatag og sustento ug suporta ngadto sa ilang lima ka mga anak sukad pa niadtong Disyembre 2011.

Apan ang maong akusado wala na nipakita ug nagdumili na sa pagsuporta sa ilang mga anak hinungdan nga gisang-at sa biktima ang maong kaso. (BANAT NEWS)