Lalaking dunay kasabot sa Lapulapu gibabagan gipatay

CEBU, Philippines - Usa ka lalaki ang gipusil patay sa armadong mga lalaki samtang nagsakay kini sa iyang motorsiklo kauban sa kapuyo sa sitio Balanghoy, barangay Gun-ob, dakbayan sa Lapulapu alas-6 pasado ang takna sa miaging gabii.

Si SPO1 Manolito Abellanosa miila sa namatay nga mao si  Glenn Genonsalao, 33, taga sitio Tribunal sa barangay Centro sa dakbayan sa Mandaue.

Matud pa ni SPO1 Abellanosa nga sa imbestigasyon nga padung makigkita ang biktima sa iyang higala sa dakbayan sa Lapulapu  dihang pag-abot sa nahitaboan gisugat kini sa wala mailhing lalaki ug gipusil sa makadaghang higayon.

Dihang natumba ang biktima  giduol kini sa gunman nga nag-angkas sa motor ug gitiwasan. Wala hinuon maunsa ang kapuyo sa biktima.

Si PO1  Jade Querobin sa homicide section sa kapolisan sa maong dakbayan nga nahinabi sa Banat News  miingon nga unom ka mga kabhang sa bala sa kalibre 45, duha ka magazine  ug duha usab ka mga kabhang niini ang nakuha diha sa crime scene. Patay na kini paghidangat sa Lapulapu City Hospital. Ang kalambigitan sa illegal drugs ang gidudahang motibo sa maong krimen, apan wala hinuon mohatag pa og dugang detalye ang kapolisan kun nganong mao kini ilang gidudahan. (BANAT NEWS)