P16M ihatag sa Cebu City ngadto sa Comelec isip kontribusyon

CEBU, Philippines - Ang syudad sa Sugbo mohatag og P16 milyones ngadto sa Commission on Elections (Comelec) alang sa umaabot nga barangay election. Si Cebu City Mayor Michael Rama mosumite karong adlawa og Supplemental Budget (SB) ngadto sa City Council aron maaprobahan ang proposed SB nga nagkantidad og P16 milyones.

“Para di na maglabad ang barangay pangita og pondo nga ihatag ngadto sa Comelec,” eksplikar ni Rama.

Apan, si ABC President Michael Ralota misulti nga di sila mag-agad sa SB kay kun ugaling di maaprobahan sa konseho ang i-sumiter sa executive department.

“Di lang magkompyansa nga makalusot ang supplemental budget, kay kun makalusot man mo take time pa gyud na,” matud ni Ralota. Ang Comelec mimandu nga ang tanang barangay motagana og pundo di mominus diyes mil o di mokapin sa napulo ka porsyento sa general fund sa barangay nga nakalatid sa Comelec Resolution 9739.

Samtang, si Ralota mibutyag nga moduso siya og resolusyon sa konseho pagpadayon sa gibungat sa Comelec, nga ang election contribution kuhaon sa SK Funds ug dili sa pundo sa city government sama sa gi-proposed ni Rama nga SB.

Matud ni Ralota nga human maduso ang resolusyon ngadto sa Committee on Laws ug Committee on Budget and Finance alang sa rekomendasyon posibleng karong Oktubre 16 maaprobahan na sa konseho ang iyang resolusyon. (BANAT NEWS)