Driver naligsan sa oil tanker ulo buak

CEBU, Philippines - Nabuak  ang  ulo ug  namatay  ang usa  ka  drayber  sa motorsiklo  human kini malatayi sa oil tanker truck sa Pryce Gas didto  sa Cebu South Coastal Road habig sa sitio Kimba, barangay San Roque, dakbayan sa Talisay kagahapon sa alas 10:30 sa buntag.

Si PO3 Henry Diano sa City Traffic Division  sa  Talisay  miila  sa biktima nga si Jonathan Adesas, 21, taga barangay Dumlog, dakbayan sa Talisay ug drayber sa kolor itom nga Honda nga motorsiklo nga nagtangag sa plakang MC-7TC-0-6613.

Ang suspetsado mao si Felino Gutang, 55, lumad nga taga San Carlos City, Negros Occidental kinsa  maoy drayber  sa  oil tanker  nga nagtangag sa plakang GHP-844.      

Si Gutang nga nahinabi sa mga tigbalita mibutyag nga gikan siya sa dakbayan sa Naga  nga naghatud og LPG .

Miingon  siya  nga paingon na unta siya ngadto sa ilang planta sa lungsod sa Sogod  gikan  sa Naga aron mogarahe.

Samtang  ang  kapolisan nagkanayon    nga ang duha ka  mga sakyanan nagbiyahe sa samang direksiyon gikan sa habagatan paatubang ngadto sa dakbayan  sa Sugbo.

Ang motorsiklo   giingon    nga didto  moagi sa “fast lane” o habig sa wala ug  matud  pa  misuway kini  og overtake   sa oil tanker  nga  gimaneho  ni Gutang.

Apan  wala  dahoma nga  ang   motorsiklo nabangga  sa gutter  sa karsada  hinungdan  nga natumba kini ug nalatayan sa ligid sa truck. Matud ni PO3 Diano nga maayong pagkapusa sa ulo ni Adesas nga maoy hinungdan sa iyang kamatayon.

Gidala  pa kini  ngadto  sa Talisay  City District Hospital  diin didto kini ideklarar  nga dead  on  arrival.

Ang suspetsado  anaa  karon  gitanggong  sa buhatan  sa traffic  division samtang  nagpaabot  sa kiha  nga  ipasaka  sa pamilya  sa biktima. (BANAT NEWS)