Katawhan angay pasabton kun unsaon paggamit ang PDAF

CEBU, Philippines -  Giawhag ni Archbishop Emeritus Ricardo Cardinal Vidal ang nasudnong kagamhanan sa pag-edukar sa publiko bahin sa kung unsaon paggamit sa mga kongresista sa mga lokal nga proyekto ang pundong gahin alang niini.

Si Vidal namahayag niini dihang gipangutana sa mga tigbalita bahin sa gipasiatab sa Ubos Balay Balaoranan nga palig-onon ang mga polisiya sa distribusyon sa Priority Development Assistance Fund (PDAF) o pork barrel.

Ubos sa bag-ong polisiya,  ang mga magbabalaod mahimo nga mosugyot og tulo ngadto sa lima ka mga proyekto nga pang-imprastraktura nga ang kantidad dili molabaw sa P24.5 milyones nga kantidad.

Samtang gidili na ang mga ‘soft projects’ nga mao karoy nadiskubrehang sagad napadulngan sa P10 bilyones nga pork barrel scam.

Matud pang Vidal nga mahinungdanon gyud nga nakahibalo ang katawhan sa paagi sa paggamit sa pundo sa mga kongresista. (BANAT NEWS)