BOC –Cebu dunay duha ka hepe?

CEBU, Philippines - Naglibog karon ang mga kawani sa Customs Port of Cebu sa dihang miabot si Atty. Ma. Lourdes Mangaoang aron sa pag-asumir isip OIC District Collector sa Port of Cebu nga karon gidumala ni Atty. Paul Alcazaren base sa kamanduan ni BOC Commissioner Rozzano Rufino "Ruffy" Biazon.

Alas 11:00 kagahapon sa buntag miabot si Mangaoang ug mi-asumer isip Deputy Collector for Assessment base sa plantilla niini.

Daling mipatawag og pakigtigum sa mga examiner ug appraisers si Mangaoang alang sa pagpahibalo nga base sa nakuhang TRO sa Manila Regional Trial Court magpabilin siya sa iyang posisyon. Mitumaw ang kalibog sa mga kawani sa dihang mipadayag si Mangaoang nga siya ang angayan nga mahimong OIC District Collector ug dili si Alcazaren.

Gibase niya kini sa kamanduan ni Finance Secretary Cesar Purisima nga ang molingkod nga OIC mao ang sunod nga taas og ranggo nga opisyal sa maong buhatan.

Si Mangaoang usa ka Collector V samtang si Alcazaren naghupot lamang og Collector III nga posisyon base sa memorandum order ni Biazon. Hinuon si Alcazaren sa iyang bahin mipadayag nga andam siya nga mobiya sa iyang pwesto pagka OIC District Collector sa Port of Cebu kung makapakita og legal nga papeles si Mangaoang nga siya ang molingkod sa Port of Cebu.

Mipatawag usab og tigum si. Alcazaren sa tanang department heads ug mipadayag nga padayon lamang sa ilang mga gimbuhaton ug dili magpadala sa kasamtangang sitwasyon aron dili mabalda ang operasyon sa aduana.

Si Mangaoang lakip sa mga Collector V nga gidestino sa Department of Finance isip sakop sa Customs Policy and Research Office o CPRO apan adunay TRO nga giluwatan si Manila Regional Trial Court Judge Marino dela Cruz Jr. nga nagsuspenso sa implementasyon sa pagpabalhin sa 27 collectors. (BANAT NEWS)