Way alamag sa traffic laws

CEBU, Philippines - Ubang mga motorista ug pedestrian ang nagbagulbol tungod kay giingong ang mga enforcers karon sa dakbayan sa Talisay walay mga seminar ug wala kini alamag kabahin sa balaod sa trapiko.

Si Cedentario Labajo, head supervisor sa mga enforcers miangkon nga wala pay mga seminar ang ilang mga enforcer.

Apan sa milabay’ng adlaw mipadala na sila og request ngadto sa Land Transportation Office (LTO) aron mapaubos na sa seminar ang mga enforcers kabahin sa traffic management ug basic traffic rules and regulations.

Matud ni Labajo nga nagkinahanglan unta sila og mga college graduate nga mga deputized officers tungod kay ang maong position usa kini ka “specialized job” diin sama sa mga polis nga gibansay kabahin sa pagdumala sa trapiko mga gradwado kini sa kolehiyo.

Gibutyag niya nga ang siyudad karon dunay 120-130 ka mga enforcers, ang 11 niini nadestino isip mga office staff sa CTTODA.

Matud niya nga dili siya pwedeng mobalibad kung dunay idestinong mga bag-ong enforcer diha sa iyang buhatan.

Apan matud ni Labajo nga kadtong dunay mga special skills sama sa mga electrician gidestino niya kini ngadto sa ubang mga buhatan.

Mikabat ngadto sa 52 ka mga enforcers ang mo-duty sa first shift ug laing 15 kabuok nga nadestino isip mga traffic light controllers sugod alas-5 sa buntag hangtud ala 1:30 sa hapon.

Ang ikaduhang shift mo-duty kini gikan sa alas 12:30 sa hapon hangtud sa alas 9:00 sa gabii samtang ang traffic light controller mo-duty kini sa ala 1:30 sa hapon hangtud sa alas 10:00 sa gabii.

Ang siyudad duna kini lima ka mga traffic lights nga nahimutang diha sa may Gaisano Fiesta Mall sa Tabunok, eskina Blanners sa  Tabunok, sa Cebu South Coastal Road habig sa barangay San Isidro, Rabaya sa Cansojong ug Laray sa barangay San Roque.

Nunot usab niini, nabantayan nga dunay mga enforcer nga overage na apan matud ni Labajo nga ang maong mga enforcer buot nga moserbisyo ug dili na niya tan-awon ang edad niini ug educational attainment tungod kay gi-refer kini ngadto sa iyang buhatan.

Gawas niini ang CTTODA nakadawat usab og saway gikan sa ubang mga motorista nga giingong ang ubang mga enforcers mga “lousy ug untidy”.

Apan matud ni Labajo nga malipay siyang dunay mosaway nila gikan sa publiko aron usab makorhian ang ilang mga sayop. (BANAT NEWS)