Taga Kalunasan nabalaka sa landslide

CEBU, Philippines - Gikabalak-an  sa  mga molupyo  sa duha ka sitio sa barangay Upper Kalunasan, dakbayan  sa Sugbo  nga daghan  ang  mangamatay  kun  may   landslide  sa ilang  lugar  gumikan sa nagpadayon  nga  quarry operation  didto. Kini ang  gibutyag   sa  mga  molupyo  nga  nahinabi  sa Banat News  kinsa  wala  magpaila sa kabalaka  nga  kasuk-an  sila sa  tag-iya  sa mikubkob  sa  bungtod  sa ilang  lugar. Ang  maong  mga  molupyo  anaa  sa  sitio Laya  ug  sitio  Dapdap,  dili  kaayo halayo  sa bukid  nga  gipakubkob  ni Kapitan Nonilon Monares  sa Upper  Kalunasan.

Sa miaging  buwan,  nahitabo  ang  grabeng  landslide  sa maong  lugar  apan  dili pa  kaayo tantong  dako  ang  napahak  sa bukid  nga  gikitkit  sa makinarya  nga  gigamit  sa maong  quarry. Apan  karon  nga  midako na ang  maong  pahak  sa bungtod  nga  gipanitan,  magtan-aw  pa lang  daan  ang  mga  molupyo  sa palibot pangulbaan  nang  daan.

Gipaningkamotan sa Banat News   nga  mahinabi  si  Kapitan  Monares  apan wala  kini  sa  ilang  buhatan sa miaging  adlaw.

Ang  mga  molupyo  sa  maong  mga  lugar  mihangyo  sa kapitan  nga  unta  dili  lang  palabian  ang  pagpahak  sa maong  bungtod aron  nga  dili  mamiligro  ang  kinabuhi  sa  mga  molupyo  karong  panahon  sa  ting-uwan. (BANAT NEWS)