Milikay sa polis , nasikop ug gipriso

CEBU, Philippines - Nasikop sa mga elemento sa Carbon Police Station ang usa ka lalaki human kini modagan dihang gisita sa kapolisan sa dalan Magallanes ug Manalili sa dakbayan sa Sugbo kagahapon sa alas 8:00 sa buntag.

Ang maong suspetsado naila nga si Don May Magno Forones, 23, lumolupyo sa sitio Kana-as, barangay Guadalupe sa dakbayan sa Sugbo. Matud pa nga nag-roving ang mga elemento sa Carbon Police dihang may usa ka concerned citizen nga mipahibalo kanila nga may usa ka lalaki nga armado, kinsa   nasigpatan nila sa maong lugar.

Busa mirespondi ang kapolisan nga gipangulohan ni PO3 Antonio Tejero ug ilang nakita ang usa ka lalaki sa maong dalan nga susama sa gilarawan sa informer.

Diha-diha  nagpaila sila nga mga sakop sa kapolisan.

Apan samtang mipaila sila nga mga otoridad, mikaratil og dagan ang suspetsado hinungdan nga ila kining  gigukod. Nakita  sa   kapolisan nga adunay gilabay ang suspetsado nga  dihang  ilang  gisusi,  usa ka paltik  nga kalibre .22 nga Blackwidow nga revolver nga may tulo ka buhing bala sa tambor niini.

Naapsan sa kapolisan ang suspetsado busa  nasikop  ug  gibalhug dayon  sa prisohan  sa  Carbon Police Station.

Nasuta  sa  mga  otoridad   nga ang maong lalaki maoy gitumbok nga suspetsado sa pipila ka tulis nga nahitabo sa maong lugar.

Gipasakaan na og kaso ang suspetsado kagahapon sa hapon sa piskaliya sa kapolisan sa Carbon Police Station. (/WC) (BANAT NEWS)