TCPS maghigpit pagpanawat og BIN
CEBU, Philippines - Mga dawaton nga Barangay Intelligence Network (BIN) karon gihashasan pagsiguro nga wala’y mga badlongon ang madawat.
Si Senior Inspector Al Pascual, deputy sa Talisay City Police Station nga nahinabi sa Banat News mibutyag nga sa milabay’ng mga buwan nibalik sila og recruit og mga BIN.
Matud ni Pascual nga ang mga BIN isip mga force multiplier daku kaayo kini og ikatabang sa kapolisan sa pagmentenar sa kahusay ug kalinaw.
Gawas sa mga tanod sa kabarangayan mga pribadong indibidwal ang gidawat usab nga sakop sa BIN kinsa andam nga mopahigayon og boluntaryong serbisyo.
Gibutyag usab ni Pascual nga nagpahigayon sila og background investigation sa mga miaplay kung dili ba kini badlongon sa ilang lugar.
Ang mga mosulod isip BIN gipasidan-an usab kini nga purong boluntaryo ang ilang serbisyo ug wala sila’y madawat nga mga honorarium.
Sa pagkakaron duna nay kapin sa 40 ang nadawat isip BIN ug gibahin kini sa lima ka grupo diin lain-laing grupo ang mo-duty gikan sa Lunes hangtud sa Biyernes apan sa Sabado ang tanang grupo mo-duty sa Domingo maoy ilang day off apan on call sila. Ang matag grupo duna kini mangulo nga polis.
Dugang ni Pascual nga niining semanaha ang mga BIN ipaubos unya kini sa training seminar kabahin sa ilang mga gimbuhaton ilabi na sa pagkuyog nila sa checkpoint sa polis. (BANAT NEWS)
- Latest
