Gidili ang sudlanan sa bottled water ug juice nga ibabag sa aseras

CEBU, Philippines - Gipasidan-an sa mga sakop sa Cebu City Hall clearing team kadtong mga tigpaninda og mineral water ug mga juice nga maglakaw-lakaw diha sa karsada, nga dili ibutang sa aseras ang ilang mga cooler nga makababag sa agianan sa mga tawo.

Daghang mga bottled water ug mga juice ang gisakmit sa mga sakop sa Prevention Restoration Order Beautification Enhancement (PROBE) kay nasakpan nila nga gibutang ra diha sa aseras ug nakabalda sa mangagi sa maong dapit.

Giangkon hinoon ni  Marcial Arce  sa PROBE nga ang mga coolers sa tubig nga gibutangan sa mga produkto didto na nila makuha sulod sa usa ka balay-patigayon kay gidali-dali sa pagpasok sa mga tigbaligya.

Matud ni Arce nga dugay ra nila nga gibadlong ang maong mga naninda og bottled water ug juice nga dili ibutang sa aseras ang ilang baligya kay nakababag kini sa pag-agi sa mga tawo.

Gani si Arce nakigtigum na sa kadagkoan sa tigsuplay sa maong mga bottled water aron ilang pasidan-an ang ilang mga retailers.

Sa laing bahin ang paglakaw-lakaw sa maong mga tigbaligya og sigarilyo ug mga tubig diha sa karsada nakalapas usab sa balaud ug nakahatag og peligro sa mga motorista.

Matud ni Arce nga warning nila sa ubang mga tigbaligya og tubig ug juice sa ubang mga dapit sa dakbayan nga likayan nila nga makahasol sa mga maglakaw sa aseras. (BANAT NEWS)