Naglakaw giluba ang dughan angol

CEBU, Philippines - Kritikal ang kahimtang sa usa ka tawo nga gidunggab sa  wala  hisayring  hinungdan  didto  sa  sitio Sudtonggan, barangay Basak, dakbayan sa Lapulapu  sa miaging  kaadlawon.

Ang biktima mao si June Allan  Veloso, 25, ulitawo, ug ang suspetsado mao si Angelo Magalona, 24, taga barangay Gun-ob sa maong dakbayan.

Si SPO1 Manolito Abellanosa sa homicide section sa kapolisan sa maong dakbayan nga nahinabi sa Banat News miingon nga naglakaw pauli sa ilang balay gikan  sa ilang silingan ang biktima dihang  gisundan  siya  sa   suspetsado.

Dugang pa ni SPO1 Abellanosa nga dihang gilingi sa  biktima ang suspetsado, sa wala’y  hinungdan kalit lang   gihansakan  ang  dughan  niini  sa iyang  kutsilyo   hinungdan sa  pagkaangol sa biktima.

Matud pa ni SPO1 Abellanosa nga ang suspetsado dali nga miikyas pahilayo sa maong dapit ug ang biktima nga nangayo’ g panabang sa iyang pamilya dali usab nga gihatod sa Lapulapu City Hospital.

Si SPO1 Abellanosa miingon nga gibalhin  usab  dayon  ngadto  sa  Vicente Sotto Memorial Medical Center sa dakbayan sa Sugbo  ang  biktima.

Gitataw ni SPO1 Abellanosa nga dili pa nila matataw ang hinungdan  nganong  giluba  ang  biktima tungod  kay  tua  pa  kini  sa tambalanan. (BANAT NEWS)