Tulisan nasikop sa kapolisan

CEBU, Philippines - Gikatahapang sakop sa Pati Robbery Group sa dakbayan sa Mandaue nadakpan sa kapolisan didto sa Eversely Child Sanitarium sa  sitio Lourdes sa barangay Jagobiao, dakbayan sa Mandaue  sa miaging gabii.

Si SPO3 Marcos Noval Jr., sa Investigation Detection and Management Bureau (IDMB) sa Mandaue City Police Office (MCPO) miila sa nadakpan nga mao si Romero Lajola Mejias Jr., alias Potot,  27, ulitawo nga taga sitio Santo Rosario sa barangay Jagobiao sa maong dakbayan.

Matud pa ni SPO3 Noval nga ang maong dinakpan ilang nasakmitan og armas nga kalibre .38 uban sa lima ka mga buhing bala dihang ilang girikisa ang lawas niini.

Si Noval miingon nga ang maong dinakpan nga si Mejias maoy usa sa mga sakop ni  Teresito Reagan Ligan alyas Pati nga maoy giilang lider sa Pati Robbery Group sa dakbayan sa Mandaue. Si Ligan  namatay  dihang nakigpinusilay kini sa miaging bulan  kang PO1 Teresito Jemaline Ligan nga sakop sa Special Weapon and Tactics (SWAT) sa dakbayan kinsa  manghod usab niini.

Dugang pa niya nga ang maong dinakpan nga si Mejias  nag-atubang na og mga kaso nga pagpanulis human siya itumbok sa  iyang  mga  biktima  kaniadto.

Si SPO3 Noval miingon nga nakadawat sila og tawag sa telepono gikan sa usa ka concern citizen nga nagtaho kalabot sa wala hiilhing lalaki nga ilang namatikdan nga nagdala og armas.

Dali nilang gisusi ang maong taho ug sa ilang pag-abot  sa maong dapit  ilang nakita ang  suspetsado nga si Mejias nga mao ang lalaki nga  misakar  sa gihulagway nga kolor sa gisul-ob sa lalaking armado.

Dihang ilang girekisa ang lawas ni Mejias ilang nadiskobrehan ang giluklok niining  armas  hinungdan nga ila  kining  gidakop ug gibalhog sa bilanggoan. (BANAT NEWS)