Lalaki gikaligo og bala

CEBU, Philippines - Patay diha-diha ang usa ka wa maihing lalaki human kini gipusil sa pipila ka higayon sa sitio Sampaguita dalan M.J. Cuenco Avenue sa dakbayan sa Sugbo kagahapon sa ala 1:10 sa hapon.

Matud pa ni PO1 Noel Ragasao sa Mobile Patrol Group nga unang mitubag sa alarma nga iya na lang naabtan nga nagkadugo na ang  patay nga lawas sa biktima nga gitapuk-an sa mga tawo.

Si PO3 Leroy Baguio nga nahinabi sa Banat News miingon nga nakaangkon og napulo ka samad pinusilan ang biktima sa nagkadaiyang bahin sa iyang lawas og posible nga kontra sa biktima ang mipusil kaniya.

“Posible nga iyang kontra (suspek) kay patay man ang tuyo,” matud pa ni PO3 Baguio.

Narekober sa kapolisan ang 14 ka mga kabhang sa .9mm ug kalibre .45 nga armas palibot sa patay nga lawas sa biktima. Narekober usab gikan sa biktima ang usa ka paltik nga .38 nga revolver nga wala’y sulod nga bala ug walo ka mga buhing bala sulod sa pitaka niini ug kapin sa P200 nga kwarta.

Si Arnel Gelig lumolupyo sa maong lugar miingon nga nakabati siya og tulo ka hugna sa buto ang una ug ikaduhang hugna tagsa lang ka buto apan sa ikatulong hugna nagpaka-paka na.

Midagan si Gelig sulod sa ilang balay ug pagkataud-taod migawas kini ug iya na lang nakita nga nagbuy-od na ang biktima nga nabulit sa dugo.

Naigo usab si Rodel Magnanao, 18, nga taga Negros Occidental nga naninda og adobong manok sa maong lugar sa walang aping niini ug daling gidala sa Cebu City Memorial Medical Center sa kapolisan. Padayon pa ang imbestigasyon nga gihimo sa Homicide Section sa motibo sa pagpamusil sa biktima.

Ang maong lalaki  basi sa kasaligang tinubdan gikataho nga nagpuyo sa lungsod sa Consolacion ug adto lang mag-embudohan sa Villagonzalo ug naila lang sa tawag nga “Inoc o Dingdong.” (BANAT NEWS)