Maestro gi-ambush

CEBU, Philippines - Duha ka mga lalaki ang gipusil patay sa lungsod sa Dumanjug sa miaging adlaw, usa kanila maestro sa public school sa maong lungsod.

Patay ang usa ka magtutudlo nga gikan nitambong sa Teacher’s Night human banhigi sa wala pa mailhing tawo sa sitio Lumboy, barangay Camabong sa lungsod sa Dumanjug sa alas 11:54 sa miaging gabii.

Ang magtutudlo nga gipatay naila nga si Ariel Antonio Yu Zucena, 45, magtutudlo sa Lawaan Elementary School sa Dumanjug ug lumolupyo sa barangay Lawaan.

Base sa imbestigasyon sa kapolisan nagmaneho si Zucena sa iyang motorsiklo padulong sa iyang balay human kini nitambong sa  Teachers Night angkas ang iyang 12- anyos nga anak nga babaye dihang may duha ka mga tawo nga luwan sa usa ka Honda nga motorsiklo mipatungod kanila.

Matud pa nga pagtan-aw sa biktima sa duha  ang angkas mition sa iyang pusil ngadto sa walang bahin sa ulo sa biktima dayong pusil niini.     

Natumba ang motorsiklo sa biktima sa national highway ug matud pa mipaduol ang mga suspetsado sa biktima ug gitiwasan kini sa iyang tiil ug tiyan. Nakaangkon og pangos sa bukton ang anak sa biktima human kini malabay sa pagkatumba sa motor.

Ang mga suspetsado nga nagsul-ob og bonnet ug nagtaptap sa ilang mga nawong ug panyo mibalik sa ilang agi ug mipasirit og padagan palayo. Si Senior Insp. Cesar Misola, Jr, ang hepe sa Dumanjug Police miingon nga ilang tan-awon ang motibo sa maong pagpamanhig kun may kalabotan ba sa trabaho ug love triangle.

Ang biktima gikataho nga dunay napapriso nga silingan nga iyang gikabingkil samtang buwag usab kini sa iyang asawa ug gikataho nga may gikapuyo nga lain sa wala pa sila magka-uli sa iyang asawa.

Ang anak sa biktima wala gyud makaila sa mga suspetsado ug gidala sa Department of Social Welfare and Development aron ipailawom kini sa stress debriefing tungod sa trauma nga nahiagoman niini.

Samtang sa laing pagpamusil, nakalas ang usa ka Renerio Fat Bani, 29- anyos human kini gipusil sa wala pa mailhing tawo sa Barangay Bulak Lungsod sa Dumanjug sa alas 6:30 sa buntag sa miaging adlaw.  Basi sa imbestigasyon sa kapolisan nga gikan nag-inom ang biktima ug padulong na pauli dihang gipusil kini sa wala pa mailhing tawo.

Nakadungog na lang ang mga silingan ni Bani og buto sa armas ug ilang nakit-an nga nagbuy-od na ang patay  nga lawas niini sa yuta.

Ang biktima nakaangkon og duha ka samad sa ilok, usa ka samad sa luyo sa ulo, tuong kamot ug sa tiil niini.

Narekober sa kapolisan ang upat ka kabhang sa kalibre .45 ug usa ka slug sa crime scene. (BANAT NEWS)