Ulitawo naghikog sa sanga sa tuba-tuba

CEBU, Philippines - Nagbitay nga wala  nay  kinabuhi  sa sanga sa tuba-tuba ang  usa ka construction  worker didto sa kalibonan  nga  bahin  sa  sitio  Soong, barangay Mactan, dakbayan  sa Lapulapu sa miaging  Biyernes sa buntag.

Gituohan  nga  naghikog pinaagi  sa nylon  nga  pisi  nga  gihikot  sa iyang  liog, ang  biktima  giila  sa kapolisan  nga  si Roly Lederos, 33, ulitawo, lumad  nga  taga  dakbayan  sa Talisay, stay in  construction  worker sa Pearl Meat Shop sa Soong.

Si Senior Inspector Zenaido Pastrofide Jr.mibutyag  sa Banat News nga ang patay’ng lawas ni Lederos  napalgan ni Edmund Igot nga nagpuyo usab sa maong dapit kinsa  mitubag  sa sugo  sa lawas  sa maong  higayon.

Matud  pa  gumikan  sa kakuyaw  wala  makalahos  si Igot  sa iyang  tuyo kay  misinggit  kini  nga  nagkamamad ang  tingog pagpahibawo  sa iyang  mga  silingan  bahin  sa iyang  nakit-ang tawo  nga  nagbitay  sa  sanga  sa  tuba-tuba.  Hinuon ang  mga  silingan  abtik  usab  kaayong  mipahibawo  sa kapolisan  hinungdan  nga  miresponde  dayon kini.

Dugang pa ni Pastorfide nga sa dapit nga napalgan ang  patay’ng lawas ni Lederos walay  suicide note   nga nakita ang mga  otoridad.

Wala usab sila makakita og samad o bun-og sa lawas   ni Lederos nga timailhan nga gipatay kini og laing tawo sa wala pa kini bitaya sa punoan sa tuba-tuba.

Gitataw ni Senior Inspector Pastorfide nga ang patay’ng lawas ni Lederos nga temporaryong gipahimutang sa usa ka punerarya  sa maong dakbayan ilang ipaubos sa autopsy alang sa pagsuta kun may foul play ba o wala ang kamatayon niini.  (BANAT NEWS)