Trabahante sa city hall pasul-obo’g ID

CEBU, Philippines - Ang mga kawani sa Cebu City Hall gimandoan na ni Mayor Michael Rama nga magsul-ob gayud sa giisyu kanila nga Identification Cards (ID) atol sa ilang trabaho apan daghan pa gihapon ang wala motuman.

Si Rama mihimo sa iyang kamandoan atol sa iyang pakigpulong human sa flag-raising ceremony. Gani nabantayan sa Banat News nga ang mayor usahay magsul-ob na usab og ID, apan usahay ‘sab makalimot.

Ang kanhi mayor nga si Tomas R. Osmeña kaniadto nabantayan nga kanunay g’yud nga magsul-ob og ID bisan anaa siya sa iyang opisina ug estrikto nga mipatuman sa pagsul-ob og ID sa mga kawani.

Ang mga sakop sa Civil Security Unit (CSU) kaniadto maoy gitahasan sa pagpatuman sa kamandoan.

Ang pagpahimo sa mga ID sa City Hall gigastohan og salapi sa kagamhanan sa dakbayan, apan gihulagway nga nausik lang kay wala kini gamita sa ubay-ubay’ng mga kawani.

Mga kawani nga gihulagway nga suod sa mga opisyal ug department head sa City Hall pabiling wala motuman, bisan kadtong anaa madistino sa Office of the Mayor.

Daghang mga kawani nga dili mailhan nga nagtrabaho sa City Hall makit-an nga mobiya sa ilang opisina ug maglaroy-laroy bisan sa downtown area ug ang uban anha ra maglingkud palibot sa City Hall.  (BANAT NEWS)