Mamuhatay’g pabuto sa Rehiyon7, 8 gi-seminar
CEBU, Philippines - Mga mamuhatay og pabuto sa Rehiyon 7 ug Rehiyon 8 gipailawom og seminar alang sa luwas nga pagpanghimo niini kagahapon sa buntag.
Ang Fireworks Safety Training Seminar 2013 gipasiugdahan sa Pyrotechnic Manufacturers and Dealers Assn. Inc. gikan sa kaulohan ug Civil Security Group ug Firearms and Explosives Office o FEO sa Camp Crame.
Gipahinumduman ni FEO Chief, Chief Supt. Raul Petrasanta ang mga mamuhatay og pabuto sa pagsunod gyud sa mga "safety measures" aron malikay sa disgrasya. Naglakip na niini ang saktong sukod sa gidak-on sa mga pabuto ug gidaghanon sa pulbora.
Lakip sa maong pagpahinumdum mao ang mga lugar nga buhatanan og pabuto ug asa ang luwas nga pag-display sa mga baligya niining pabuto.
Samtang si Mayor Paz Radaza mapasalamaton sa PNP nga subling napili ang dakbayan sa Lapulapu diin gihimo ang seminar.
Gumikan niini 180 ka mga partisipanteng mamuhatay og pabuto gikan sa Rehiyon 7 ug 8 ang mitambong sa maong seminar ug nakahigayon sila pakighimamat sa ilang mga kauban sa industriya sa pabuto. (/EIM) (BANAT NEWS)
- Latest
