Duha ka wanted nga tulisan nadakpan

CEBU, Philippines - Duha ka mga wanted nga lalaki ang nasikop sa kapolisan sa lalawigan sa Sugbo human kini malutsi og warrant of arrest, usa kanila nabutang sa top 5 most wanted criminal sa Consolacion.

Ang gikatahong nadakpang tulisan mao  si John Rey Gonzales, taga dakbayan sa Danao. Siya nadakpan sa mga sakop sa Provincial Intelligence Branch sa ilahang balay ug nakuhaan og calibre 45 pistola nga dunay usa ka magazine ug unom ka bala.

Matud pa sa suspetsado ang pagpang-snatch niya og cellphones lingaw-lingaw lang niya  aron ibaligya ug ipalit og illegal nga drugas.

Ang suspetsado maoy gitumbok nga responsable sa lima ka mga pagpanulis sa dakbayan sa Danao ug sa pipila ka mga pagpanglabni sa lungsod sa Compostela, Liloan ug sa dakbayan sa Danao.

Ang warrant of arrest  giluwatan ni Judge Jerry Dicdican sa RTC Branch 25 sa dakbayan sa Danao.

Samtang nasikop usab si Joseph Baco Arcelo alyas Papot, 29, lumolupyo sa barangay Poblacion sa lungsod sa Compostela human kini motambong sa bista sa iyang laing kaso sulod sa RTC Branch 56 sa dakbayan sa Mandaue. Ang maong warrant of arrest giluwatan ni Judge Teresita A. Galanida sa RTC Branch 56 sa Mandaue alang sa kasong robbery with intimidation. (/EIM) (BANAT NEWS)