Commercial rice daghang gimahalan

CEBU, Philippines - Daghan na  ang mga tawo nga gimahalan  sa presyo sa commercial rice nga gibaligya  sa kamerkadohan ug sa mga department store, mao nga mibalhin sila sa mas bobarato og kantidad. Si Caridad Bontilao, usa ka tigbaligya og mga bugas sa Barangay Busay mibutyag nga daghan na sa iyang mga suki nga kaniadto  nga Ganador  maoy paborito apan karon mopalit na lang sa mas barato nga bugas.

Ang Ganador nga kaniadto gibaligya lang sa tag P40 ug P41 ang matag kilo, karon gibaligya na sa kantidad nga P46 ug wala pay kasiguroan kun wala ba kini sagoli og baratohon nga matang sa bugas sa mga mapahimuslanong tindera.

Sa mga department stores ang Ganador gibaligya sa tag P49 matag kilo ug aduna pa gani P51 ang matag kilo.

Si Susan Rosales nga tigpamaba sa National Food Authority (NFA) miingon nga ang NFA rice nagpabilin sa iyang kantidad nga tag P27 ang kilo sa fortified rice.

Gipasabot ni Rosales nga naandan na nga matag ingon niini nga mga buwana magnihit gayud ang bugas nga Ganador tungod sa huwaw nga moigo sa Luzon nga maoy gigikanan sa maong matang sa bugas.

Daghan ang ganahan sa maong kalidad sa bugas kay matud nila mahimo ra kun walay sud-an.

Nagtuo si Rosales nga karong sunod buwan kay ting-ani na sa mga humay, mobalik ra ang naandan nga presyo sa mga commercial rice.

Si Rhea Borja taga Barangay Apas miingon nga bisan og drayber lang sa habal-habal ang iyang bana ug gagmay ra’g kita apan dili sila ganahan sa NFA rice kay adunay lain nga baho nga dili makagusto ang iyang anak. (/WC) (BANAT NEWS)