Mayor dako'g papel sa pagpaberde sa ilang lugar

CEBU, Philippines - Gipahibawo ang tanang  mga  mayor  sa lungsod  sa dako nilang kaakohan  sa pag-atiman  sa mga  tanom  nga  makapaberde  sa ilang tagsa-tagsa  ka lungsod.

Si Regional Director Isabelo Montejo sa Department of Environment  and Natural  Resources (DENR)7 usa  sa mamumulong  sa general assembly meeting  sa mga membro sa League of Municipalities in the Philippines (LMP) Cebu Chapter  didto sa Casino Español, ning siyudad  sa Sugbo  kagahapon.

Ang  maong panagtagbo  gipangunahan  pinaagi  sa presidente  sa LMP nga si Tuburan  Mayor Democrito “Junjun” Diamante.

Matud  ni Diamante  nga silang  mga  mayor  sa kalungsoran dako  kaayo  og  papel  sa pag-atiman sa tanang  aspeto  gikan  sa panginabuhi, panglawas, edukasyon, ingon  man  ang  bahin  sa kalikopan.

Gani  gipasaligan  niini si Montejo nga  pinaagi  sa panagtagbo  matag  karon ug unya sa  mga  mayor, ma-monitor  nila  ang mga  kaugmaran  sa mga proyekto  niini  nga may labot  sa kalikopan.

Gipaila  ni  Montejo  ang  lima  sa  mga  labing dagko  nga  proyekto  sa DENR nga mao ang  National Greening Program, Cadastral Survey, Titling, Geohazard Mapping, ug Clean water program.

Matud  pa  ni  Montejo  nga dili  sila molampos sa maong  programa gawas  kun  ang  mga hepe ehekutibo  sa matag lungsod mosuporta  kanila. (/WC) (BANAT NEWS)