Pamilyang Tabanao nangayo’g hustisya

CEBU, Philippines - Gihatud na kagahapon sa hapon ngadto sa kataposan niyang pahulayan ang kanhi tigbalita ug tigpamaba sa Philippine Drug Enforcement Agency (PDEA) ug sakop sa media nga si Jesus “Jessie” Tabanao. Sa report sa Aksiyon Bisaya, ang patay’ng lawas ni Tabanao gikan sa ilang balay sa barangay Balabagon, lungsod sa Moalboal gidala kini ngadto sa simbahan ni San Juan Nepomoceno alang sa Misa Requim una pa kini gihatud ngadto sa Tunga Public Cemetery.

Ang mga paryente ug kahigalaan ni Tabanao nagsul-ob og kolor itom nga armband simbolo sa ilang pagbangutan.

Mitumaw ang emosyon sa mga kabanay ni Tabanao dihang paingon nang mahuman ang misa.  Dunay nag-una nga nagbitbit og banner nga dunay suwat nga “justice for Tabanao” atol sa pagpaingon na sa sementeryo.

Ang mga kauban ni Tabanao sa PDEA ug ang asawa niining si Katrina kinsa manganakay na sa sunod buwan ug ang ilang anak ang miabay sa purlon.

Ang pamilya ni Tabanao nanghinaot nga mahatagan og hustisya ang iyang kamatayon. (/EIM) (BANAT NEWS)