Opisyal nibali-bali og kasaba sa kawani
CEBU, Philippines - Gibati og kahadlok ug kasagmuyo ang usa ka sakop sa Talisay Rescue Emergency Action Team (TEAM) human kini giingong gikasab-an ug gikudlitan ang ulo sa hepe sa motorpool sa siyudad niadtong milabay’ng adlaw.
Ang mireklamo ngadto sa kapolisan mao si Giovanni Villoria Hernani, 32, taga barangay San Isidro, dakbayan sa Talisay. Samtang ang iyang gireklamo mao ang igsuon ni Talisay City Mayor Johnny De Los Reyes nga si Joel De los Reyes.
Sa imbestigasyon ni PO2 Jason Del Campo nga sa wala pa mahitabo ang insidente si Hernani giingong mipatubil sa ambulansiya sa siyudad ngadto sa ilang suking gasoline station.
Apan imbes nga gasolina ang itubil giingong krudo ang natubil niini, dugang pa niini nga giingong naughan usab og tubig ang radiator tank sa makina.
Tungod niini, giingong nasuko og maayo si Joel ug giingong gitudlo-tudlo siya niini ug pagkahuman gikudlitan ang ulo ni Hernani sa tudlo sa maong opisyal.
Si Hernani mipasangil usab nga gibalikas siya og maayo sa opisyal “pe__ b___g ka, b__o ka, wala kay alam, ikaw nakaguba sa ambulance, k___g ka, tawo kang Gullas unya kunsabo mo inyo gub-on ang ambulance para maguba ang administrasyon.â€
Tungod niini si Hernani nasagmuyo ug gibati og kahadlok hinungdan nga mi-report siya ngadto sa kapolisan.
Si Mayor De los Reyes nga nahinabi sa Banat News kagahapon nagkanayon kini nga ipatawag niya karong adlawa (Biyernes) ang duha aron maimbestigar kabahin sa maong insidente.
Dugang sa mayor nga posibleng duna lay miscommunication ang matag habig. (/EIM) (BANAT NEWS)
- Latest
